SFNസായാഹ്ന ഫൌണ്ടേഷൻ
images/Idylle_pastorale_sur_le_fleuve.jpg
Shepherds idyll on the river, a painting by Jean François Duval (1776-1854).
3
വന്നി​ല്ല നീ​യെ​ങ്കിൽ
ലൂയി അറാ​ഗോൻ (LOUIS ARAGON, 1897-1982)

ഫെ​മി​നി​സം കൊ​ടി​കു​ത്തി​വാ​ഴു​ന്ന പാ​രീ​സിൽ​നി​ന്നു പതി​ഭ​ക്തി​യു​ടേ​തായ പതി​ഞ്ഞ സ്വ​ര​ത്തിൽ ഇതാ ഒരു ആത്മ​നി​വേ​ദ​നം. വൈ​പ​രീ​ത്യ​മെ​ന്നു തോ​ന്നാം, ഒരു ഭാരത സ്ത്രീ​യു​ടേ​തെ​ന്നു സം​ശ​യി​ച്ചു പോ​കാ​വു​ന്ന​വി​ധം അത്ര​യ്ക്കു പാ​ര​മ്പ​ര്യാ​ധി​ഷ്ഠി​ത​മായ മൂല്യ ബോ​ധ​ത്തി​ന്റെ നനു​ത്ത ശബ്ദം! കാ​ര​ണ​മി​ല്ലാ​തി​ല്ല. പൊ​തു​വിൽ കു​ടുംബ ബന്ധ​ങ്ങൾ​ക്കു വില കല്പി​ക്കു​ന്ന പര​മ്പ​രാ​ഗത ക്രൈ​സ്തവ മൂ​ല്യ​ങ്ങ​ളെ അനു​വർ​ത്തി​ക്കു​ന്ന​വ​ളാ​ണ് ഫ്ര​ഞ്ച് സ്ത്രീ. പോ​രെ​ങ്കിൽ അടു​ത്ത​കാ​ലം വരെ വോ​ട്ട​വ​കാ​ശ​മോ സാ​മ്പ​ത്തിക ഇട​പാ​ടു​കൾ നട​ത്താൻ സ്വാ​ത​ന്ത്ര്യ​മോ ഇല്ലാ​ത്ത ഒരു പി​ന്നോ​ക്ക​ക്കാ​രി​യു​മാ​യി​രു​ന്നു. ഇത​ത്രെ ഈ കവി​ത​യിൽ പ്ര​ക​ട​മാ​യി​ട്ടു​ള്ള ‘വി​ധേ​യത’യുടെ പശ്ചാ​ത്ത​ലം. ലൂയി അറാ​ഗോൻ ആധു​നി​ക​ക​വി​ക​ളിൽ അഗ്ര​ഗ​ണ്യ​നാ​ണ്. സർ റി​യ​ലി​സ​ത്തി​ന്റെ ഉപ​ജ്ഞാ​താ​ക്ക​ളി​ലൊ​രാ​ളാ​യി​രി​ക്കേ കമ്യൂ​ണി​സ​ത്തി​ലേ​ക്ക് ആകൃ​ഷ്ട​നാ​യി സോ​ഷ്യ​ലി​സ്റ്റ് റി​യ​ലി​സ്റ്റാ​യി മാറി യു​ദ്ധ​കാ​ല​ത്ത് ‘പ്ര​തി​രോധ’ കവി​യാ​യി. സോ​വ്യ​റ്റ് യൂ​ണി​യൻ പ്രാ​ഗ്വ​സ​ന്ത​ത്തെ അടി​ച്ച​മർ​ത്തി​യ​തിൽ പ്ര​ധി​ഷേ​ധി​ച്ചു സാർ​ത്രി​ന്റെ​യും മറ്റു​മൊ​പ്പം കമ്മ്യൂ​ണി​സ​ത്തോ​ട് വി​ട​പ​റ​ഞ്ഞു. ഒടു​വിൽ ശുദ്ധ ലി​റി​സി​സ​ത്തി​ന്റെ ഉദാ​ത്ത മാ​തൃ​ക​ക​ളായ കവി​ത​ക​ളു​ടെ കർ​ത്താ​വാ​യി.

വന്നി​ല്ല നീ​യെ​ന്റെ പാ​ത​യി​ലെ​ങ്കിൽ ഞാ-
നെ​ന്താ​കു​മാ​യി​രു​ന്നെ​ന്നോർ​ത്തു പോ​ക​യാം,
കാ​ട്ടി​ന്ന​ക​ത്തൊ​രു നൂ​റ്റാ​ണ്ടു നീ​ളു​ന്ന
നി​ദ്ര​യി​ലാ​ണ്ടു കി​ട​പ്പ​വ​ളാ​യി​ടാം [1]
ഓട്ട​മ​റ്റ​ക്ക​പ്പ​ല​ക​മേൽ നി​ശ്ച​ലം
നി​ല്ക്കും ഘടി​കാര സൂ​ചി​ക​യാ​യി​ടാം
അക്ഷ​ര​വ്യ​ക്തി​യും അർത്ഥസ്ഫുടതയു-​
മറ്റു​ള്ള വാ​ക്കു​ക​ളോ​തു​വോ​ളാ​യി​ടാം
വന്നി​ല്ല നീ​യെ​ന്റെ പാ​ത​യി​ലെ​ങ്കിൽ ഞാ
നെ​ന്താ​കു​മാ​യി​രു​ന്നെ​ന്നോർ​ത്തു പോ​ക​യാം
മാ​നു​ഷി​ക​ങ്ങ​ളാം കാ​ര്യ​ങ്ങ​ളൊ​ക്കെ​യും
ഞാ​നി​ങ്ങ​റി​ഞ്ഞ​തു നി​ന്നി​ലൂ​ട​ല്ല​യോ
വി​ശ്വ​ത്തെ ഞാ​ന​ഭി​വീ​ക്ഷി​പ്പ​തേ തവ-
വീ​ക്ഷാ​വി​ശേ​ഷ​ത്തെ മാ​തൃ​ക​യാ​ക്കി​യാം [2]
നി​ന്നിൽ നി​ന്നെ​ല്ലാം പഠി​ച്ചു ഞാൻ
തണ്ണീ​രു നീ​രു​റ​വീ​ന്നും കു​ടി​യ്ക്കും കണ​ക്കി​നേ
വി​ണ്ണിൻ വി​ദൂ​ര​ത​യി​ങ്ക​ലെ നക്ഷത്ര-​
വൃ​ന്ദ​ങ്ങൾ തൻ പൊ​രു​ളോ​രു​ന്ന മാ​തി​രി
ഗാ​ന​നി​ര​ത​നാ​യ് പോകും പഥി​ക​ന്റെ
താ​ന​ങ്ങൾ കേ​ട്ടു പഠി​ക്കു​ന്ന പോലവേ
ഉൾ​ക്കു​ളി​രെ​ന്തെ​ന്ന​തുൾ​പ്പെ​ടെ നിന്നിലൂ-​
ടുൾ​ക്കൊ​ള്ളു​വാൻ കഴി​ഞ്ഞെ​ല്ലാ​മെ​നി​ക്ക​യേ
വന്നി​ല്ല നീ​യെ​ന്റെ പാ​ത​യി​ലെ​ങ്കിൽ ഞാ-
നെ​ന്താ​കു​മാ​യി​രു​ന്നെ​ന്നോർ​ത്തു പോ​ക​യാം
വാ​ഴ്‌​വിൻ സമ​സ്യ​കൾ നേ​രി​ടാൻ വേ​ണ്ട​തും
സ്വാ​യ​ത്ത​മാ​ക്കി ഞാൻ നി​ന്നി​ലൂ​ട​ന്വ​ഹം
തേറി ഞാ​നു​ച്ച​വെ​യി​ലൂ​ക്കു നിന്നിലൂ-​
ടംബരം നീ​ലി​മ​യാർ​ന്നി​ടാ​മെ​ന്ന​തും
ജീ​വി​താ​ന​ന്ദ​മൊ​രു പാ​ന​ശാ​ല​യിൽ
മങ്ങി​യെ​രി​യും പ്ര​ദീ​പ​മ​ല്ലെ​ന്ന​തും
രണ്ടു​പേ​രൊ​ന്നാ​യി​ത്തീ​രു​ന്ന ദാമ്പത്യ-​
ബന്ധ​മെ​ന്തെ​ന്നു​ള്ള​റി​വേ മനു​ജ​നു
നഷ്ട​മാ​യു​ള്ളൊ​രി​ന്ന​വ്യ​ന​ര​ക​ത്തിൽ [3]
എൻ കയ്യു​നിൻ​ക​യ്യി​ലേ​ന്തി നട​പ്പു നീ [4]
വന്നു പി​ടി​ച്ചു​തേ മൽക്കരമാനന്ദ-​
തു​ന്ദി​ല​നാ​മൊ​രു കാ​മു​ക​നാ​യി നീ [5]
വന്നി​ല്ല നീ​യെ​ന്റെ പാ​ത​യി​ലെ​ങ്കിൽ ഞാ-
നെ​ന്താ​കു​മാ​യി​രു​ന്നെ​ന്നോർ​ത്തു​പോ​ക​യാം
ആന​ന്ദ​ഗാ​ന​മു​തിർ​പ്പോർ​ക്കു​മ​ക്ഷി​കൾ
ആത​ങ്ക​ഭാ​വം കലരാം പല​പ്പൊ​ഴും
ഭഗ്ന​പ്ര​തീ​ക്ഷ​തൻ ഗദ്ഗ​ദ​മാ​യി​ടാം
വാ​ദ​ന​വേ​ള​യിൽ തന്ത്രി​തൻ ഭം​ഗ​മാം
എന്നാ​ലു​മാ​ന​ന്ദ​പ്രാ​പ്തി​യ്ക്കു വേണ്ടത്ര-​
യു​ണ്ടി​ട​മെ​ന്നു താൻ നി​ന്നോ​ടു ചൊൽവു ഞാൻ
സു​പ്തി​യിൽ​പ്പൊ​ങ്ങും കി​നാ​ക്ക​ളി​ല​ല്ല​തു
മാ​ന​ത്തു​ലാ​ത്തും മു​കിൽ​ക​ളി​ല​ല്ല​തു
ഈ മണ്ണിലീമണ്ണിലിന്നിയുമജ്ഞാത-​
മാ​യെ​ത്ര​യെ​ത്ര തു​റ​മു​ഖ​മി​ല്ല താൻ [6]
വന്നി​ല്ല നീ​യെ​ന്റെ പാ​ത​യി​ലെ​ങ്കിൽ
ഞാ​നെ​ന്താ​കു​മാ​യി​രു​ന്നെ​ന്നോർ​ത്തു പോ​ക​യാം.

Que Serais-​Je Sans toi

കു​റി​പ്പു​കൾ
[1]
ദുർ​മ്മ​ന്ത്ര​വാ​ദി​നി​യു​ടെ ചതി​മൂ​ലം, ഒരു രാ​ജ​കു​മാ​രൻ വന്നു​ണർ​ത്തു​ന്ന​തു​വ​രെ നൂ​റു​കൊ​ല്ലം കാ​ട്ടി​ലു​റ​ങ്ങി​പ്പോയ രാ​ജ​കു​മാ​രി​യു​ടെ കഥ.
[2]
ഓമൽ പ്ര​ണ​യം തു​ളു​മ്പും നല്ലൊ-​
രോ​ട​ക്കു​ഴൽ​വി​ളി കേൾ​പ്പൂ
ഹാ, മത്ത​നു​ലത പെ​ട്ടെ​ന്നൊ​രു
രോ​മാ​ഞ്ച​മാ​യി​ക്ക​ഴി​ഞ്ഞു.
അക്ഷയ ജ്യോ​തി​സ്സ​ണി​ഞ്ഞെൻ ജീവൻ
നക്ഷ​ത്രം കൊ​ണ്ടു നി​റ​ഞ്ഞു.
(ചങ്ങ​മ്പുഴ — വൃ​ന്ദാ​വ​ന​ത്തി​ലെ രാധ)
അവി​ടു​ന്നു ഭേ​സി​ടും ഭാ​ര​മാ​ണെൻ ഭാരം
അവി​ടു​ത്തെ മാർ​ഗ്ഗ​മെ​നി​ക്കു മാർഗം.
(വൈ​ലോ​പ്പി​ള്ളി — കൊ​റി​യ​യിൽ, സി​യൂ​ളിൽ)
Teach me, only teach, Love !
As I ought
I will speak thy speech, Love
Think thy thought.
(Robert Browning — A Woman’s Last Word)
[3]
പ്രേ​മ​മൊ​രു​മി​നീ​രാ​യ്ക്കാ​ണു​വോർ കായിൻ പേരിൽ
പൂ മതി​ക്കു​വോർ ഒന്നും പു​ണ്യ​മാ​യെ​ണ്ണീ​ടാ​ത്തോർ.
(വൈ​ലോ​പ്പി​ള്ളി — യു​ഗ​പ​രി​വർ​ത്ത​നം)
[4]
വന്നു​പോൽ ചി​റ​കാർ​ന്ന ഭീതികളെനിക്കായി-​
ത്ത​ന്നി​ടാൻ പരീ​ക്ഷി​ക്കാ​നോ​രോ​രോ സമ്മാനങ്ങൾ-​
നോവുക, ളാ​ല​സ്യ​ങ്ങൾ, രോ​ഗ​ങ്ങൾ, നി​രാ​ശ​യിൽ
വീ​ഴാ​തെ സു​ശ​ക്ത​മാം നിൻ​കൈ​ക​ളെ​ന്നെ​ത്താ​ങ്ങി.
(സു​ഗ​ത​കു​മാ​രി — അത്ര​മേൽ സ്നേ​ഹി​ക്ക​യാൽ)
നാ​ടു​വേ​രു​കൾ പൊ​ട്ടി ത്വ​രി​തം ചലി​ക്ക​വേ
ചോ​ടു​തെ​റ്റി​യെൻ കരൾ തേ​ങ്ങു​ന്നു മന്ത്രി​ക്കു​ന്നു
‘ഹാ സഖി നീ​യെ​ന്നോ​ടു​ചേർ​ന്നു നി​ല്ക്കുക.…’
(വൈ​ലോ​പ്പി​ള്ളി — യു​ഗ​പ​രി​വർ​ത്ത​നം)
… ഒരു വി​ശ്വാ​സ​ത്തി​ന്റെ പൊ​ന്നൂ​ഞ്ഞാൽ​പ്പാ​ട്ടും​പാ​ടി
അന്യോ​ന്യ​മൂ​ന്നാ​യ്പ്പോ​കാം, ഭൂ​വി​ലെ വാ​ഴ്‌​വേ സത്യം.
(മു​ല്ല​നേ​ഴി — സതി)
തരിക നിൻ വലതു കൈ / തു​ട​രാ​മീ​യ​നു​യാ​നം
ചരി​യു​മീ വെ​ട്ട​മെ​ന്നും / നമു​ക്കു സ്വ​ന്തം.
(ശ്രീ​ധ​ര​നു​ണ്ണി — അനു​യാ​നം)
ദുഃഖഭാരങ്ങളിറക്കുവാനന്യോന്യ-​
മത്താ​ണി​യാ​യി നാം! -​കൊച്ചു സ്വ​പ്ന​ങ്ങ​ളും
കൊ​ത്തി​യു​ട​ച്ചു കൊ​റി​ച്ചി​രു​ന്നു. ശ്രമ-
തപ്ത​മാം പാദം തര​ള​മാം പാണിയാ-​
ലൊ​ട്ടു തലോ​ടി​യി​രു​ന്നു മയ​ങ്ങി നാം,
അല്പ​മാ​ത്ര​ങ്ങ​ളാം വി​ശ്രമ വേളകൾ,
(ഒ. എൻ. വി. — ശാർ​ങ്ഗ​ക​പ്പ​ക്ഷി​കൾ)
The breathing in unison
Of lovers whose bodies Smell of each other
Who think the same thoughts without need of speech
And babble the same speech without need of meaning.
(T. S. Eliot — A Dedication to my Wife)
[5]
വന്നു നീയെൻ വാ​തി​ല്ക്കൽ അർ​ത്ഥി​യാ​യ് ജേ​താ​വാ​യും
എന്മി​ഴി​ക​ളി​ലൊ​രേ നി​ന​വാ​യ് കി​നാ​വാ​യും.
(സു​ഗ​ത​കു​മാ​രി — അത്ര​മേൽ സ്നേ​ഹി​ക്ക​യാൽ)
She found me roots of relish Sweets
And honey wild and manna-​dew
And Sure in language Strange she said
I love thee true.
(Keats — La Belle Dame Sans Merci)
[6]
മന്നി​ന്റെ മാമൂൽ പടു​ത്ത കട​വ​ത്തു
നി​ന്നു​മീ രാവിൽ നാം നീ​ക്കുക തോ​ണി​യെ
ഓമൽ സ്മി​ത​ത്തി​ന്റെ​യു​ന്മേ​ഷ​മാക നാം
പൊ​ന്നിൻ മലരും മണ​വു​മാ​കാ​വു നാം.
ഇന്നു പര​സ്പ​രം ചും​ബി​ക്ക ഹൃത്തുക്ക-​
ളൊ​ന്നാ​യ് വി​ടർ​ന്നു​ള്ള പു​ഷ്പ​ങ്ങൾ പോലവേ,
(പി. കു​ഞ്ഞി​രാ​മൻ നായർ — പ്രേ​മ​പൗർ​ണ്ണ​മി)
Colophon

Title: French Romantic Poems (ml: ഫ്ര​ഞ്ച് പ്ര​ണ​യ​ഗീ​ത​ങ്ങൾ).

Author(s): Mangalat Raghavan.

First publication details: DC Books; Kottayam, Kerala; 2003.

Deafult language: ml, Malayalam.

Keywords: Poem, Mangalat Raghavan, French Romantic Poems, മം​ഗ​ലാ​ട്ട് രാഘവൻ, ഫ്ര​ഞ്ച് പ്ര​ണ​യ​ഗീ​ത​ങ്ങൾ, Open Access Publishing, Malayalam, Translation, Sayahna Foundation, Free Software, XML.

Digital Publisher: Sayahna Foundation; JWRA 34, Jagthy; Trivandrum 695014; India.

Date: September 18, 2021.

Credits: The text of the original item is copyrighted to the author. The text encoding, editorial notes and index were created and​/or prepared by the Sayahna Foundation and are licensed under a Creative Commons Attribution By NonCommercial ShareAlike 4​.0 International License (CC BY-​NC-SA 4​.0). Commercial use of the content is prohibited. Any reuse of the material should credit the Sayahna Foundation and must be shared under the same terms.

Cover: Shepherds idyll on the river, a painting by Jean François Duval (1776-1854). The image is taken from Wikimedia Commons and is gratefully acknowledged.

Production history: Data entry: Staffers at River Valley; Proofing: KB Sujith; Typesetter: CVR; Editor: PK Ashok; Digitizer: KB Sujith; Encoding: CVR.

Production notes: The entire document processing has been done in a computer running GNU/Linux operating system and TeX and friends. The PDF has been generated using XeLaTeX from TeXLive distribution 2021 using Ithal (ഇതൾ), an online framework for text formatting. The TEI (P5) encoded XML has been generated from the same LaTeX sources using LuaLaTeX. HTML version has been generated from XML using XSLT stylesheet (sfn-​tei-html.xsl) developed by CV Radhakrkishnan.

Fonts: The basefont used in PDF and HTML versions is RIT Rachana authored by KH Hussain, et al., and maintained by the Rachana Institute of Typography. The font used for Latin script is Linux Libertine developed by Phillip Poll.

Web site: Maintained by KV Rajeesh.

Download document sources in TEI encoded XML format.

Download PDF.