SFNസാ​യാ​ഹ്ന ഫൌ​ണ്ടേ​ഷൻ
images/Idylle_pastorale_sur_le_fleuve.jpg
Shepherds idyll on the river, a painting by Jean François Duval (1776-1854).
79
തടാകം
അൽ​ഫോം​സ് ദ് ലമാർ​ത്തീൻ (ALPHONSE DE LAMARTINE, 1790-1869)

‘മാം​സ​നി​ബ​ദ്ധ​മ​ല്ലാ​ത്ത രാഗം!’ മാം​സ​നി​ബ​ദ്ധ​മാ​കാ​തെ മാ​ന​സിക തല​ത്തിൽ മാ​ത്ര​മു​ള്ള പ്രേ​മ​വും ഏതു ചു​റ്റു​പാ​ടി​ലും മാ​ച്ചാ​ലും മാ​യാ​തെ നി​ല​കൊ​ള്ളു​ന്നു. ഫ്ര​ഞ്ച് റൊ​മാ​ന്റി​ക് കാ​വ്യ​ലോ​ക​ത്തി​നു വി​ക്തോർ ഹ്യൂ​ഗൊ​വി​നോ​ടൊ​പ്പം നേ​തൃ​ത്വം നല്കിയ അൽ​ഫോം​സ് ദ് ലമാർ​ത്തി​ന്റെ അനു​ഭ​വ​മാ​ണി​ത്. ഭർ​ത്തൃ​മ​തി​യും ക്ഷ​യ​രോ​ഗ​ബാ​ധി​ത​യു​മായ എൽ​വി​റു​മാ​യി സു​ഖ​വാ​സ​കേ​ന്ദ്ര​മായ ബുർഴെ (Bourget) തടാ​ക​തീ​ര​ത്തു​വെ​ച്ചു ലമാർ​ത്തീൻ പരി​ച​യ​പ്പെ​ടു​ന്നു. അതി​ഗാ​ഢ​മായ ഒരു ആത്മീ​യ​ബ​ന്ധ​മാ​യി​തു​മാ​റി. വരും​കൊ​ല്ലം വീ​ണ്ടു​മ​വി​ടെ​വെ​ച്ചു കാ​ണാ​മെ​ന്ന പ്ര​തീ​ക്ഷ​യിൽ ഇരു​വ​രും പി​രി​ഞ്ഞു. പക്ഷേ, ഇതി​നി​ട​യിൽ എൽവീർ മര​ണ​മ​ട​ഞ്ഞു. ഒരു ചി​ര​ന്തന ജീ​വി​ത​സ​ഖി​യു​ടെ വേർ​പാ​ടി​ലെ​ന്ന പോലെ ലമാർ​ത്തി​ന്റെ ഹൃദയം വേ​ദ​നി​ച്ചു. പിൽ​ക്കാ​ല​ത്ത് വി​വാ​ഹി​ത​നാ​യി സന്തു​ഷ്ട​മായ കു​ടും​ബ​ജീ​വി​തം നയി​ക്കു​മ്പോ​ഴും, കരു​ണ​ര​സം വഴി​യു​ന്ന കവി​ത​ക​ളു​ടെ വറ്റാ​ത്ത ഒരു​റ​വി​ട​മാ​യി, ഈ വ്യഥ അദ്ദേ​ഹ​ത്തെ പി​ന്തു​ടർ​ന്നു. അദ്ദേ​ഹ​ത്തി​ന്റെ മി​ക​ച്ച കവി​ത​ക​ളിൽ പലതും എൽവീർ സ്മ​ര​ണ​യിൽ​നി​ന്ന് ഉയിർ​ക്കൊ​ണ്ട​വ​യാ​ണ്. പി​റ്റ​ത്തെ കൊ​ല്ലം ബുർഴെ തടാ​ക​തീ​ര​ത്തിൽ പോ​യ​പ്പോൾ എഴു​തി​യ​താ​ണി​ത്.

നവ നവ തീ​ര​ങ്ങൾ തന്നി​ലേ​യ്ക്കി​ങ്ങി​നെ
നി​യ​ത​വും നാം തള്ള​പ്പെ​ട്ടി​ടു​മ്പോൾ
തി​രി​കെ​യെ​ന്നാ​ളും വരാ​വി​ധം നി​ത്യ​മാം
നി​ശ​യി​ങ്ക​ലേ​യ്ക്കു നാം നീ​ത​രാ​കേ
കഴി​യു​മോ നങ്കൂര മെ​റി​യു​വാൻ കാ​ല​ത്തിൻ
കടലിൽ നമു​ക്കൊ​രു നാ​ളു​പോ​ലും? [1]
സരസി, കഷ്ടി​ച്ചേ കഴി​ഞ്ഞു​ള്ളു വത്സ​രം,
അവൾ വീ​ണ്ടും കാ​ണേ​ണ്ട​താ​യി​രു​ന്ന
പ്രി​യ​ത​രം​ഗ​ങ്ങൾ​ക്ക​രി​കി​ലാ​യ​ന്ന​വൾ
ഉപ​വി​ഷ്ട​യാ​യി നീ കണ്ട​താ​കും
വന​ശി​ലാ​ത​ല​മി​ത്തിൽ, നോ​ക്കുക, ഞാ​നി​താ [2]
തനിയെ താൻ വന്നി​രു​ന്നീ​ടു​ക​യാം.
ഉത്തും​ഗ​മാ​കു​മി​പ്പാ​റ​കൾ​ക്ക​ടി​യിൽ നീ
ഇപ്പോ​ലെ ഗർ​ജ്ജ​നം ചെ​യ്തി​രു​ന്നു.
ദളിതം തൽ പാർ​ശ്വ​ങ്ങൾ മേ​ലെ​യി​പ്പോ​ലെ നി- [3]
ന്ന​ല​കൾ സ്വയം വീ​ണു​ട​ഞ്ഞി​രു​ന്നു.
തവ​നു​ര​യി​പ്പോ​ലെ തൽ​സ​മാ​രാ​ധിത [4]
പദ​താ​രി​ലർ​പ്പി​ച്ചി​രു​ന്ന​നി​ലൻ.
ഒരു സായംസന്ധ്യയിൽ-​ഓർപ്പിതോ?-​നീരവം [5]
ഒരു നൗ​ക​യി​ങ്ക​ലൊ​ഴു​കി ഞങ്ങൾ. [6]
തു​ഴ​യു​വോർ താ​ള​ത്തിൽ നിൻ സു​സ്വ​രോർ​മ്മി​കൾ
തുടരേ മു​റി​പ്പ​ത്തിൻ ശബ്ദ​മൊ​ന്നേ
ജല മു​ക​ളി​ങ്ക​ലും വാ​നി​നു കീ​ഴി​ലും
അക​ലെ​യും ആരാ​ലും കേ​ട്ട​തു​ള്ളൂ.
അതു​പോ​തു പെ​ട്ടെ​ന്ന​ലൗ​കി​ക​മാ​യെ​ഴും
ഒരു നാ​ദ​വൈ​ഖ​രി നിൻ മനോജ്ഞ-​
തട​ഭൂ​വിൽ മാ​റ്റൊ​ലി​ക്കൊ​ണ്ടു, നി​ന്നോ​ള​ങ്ങൾ
അവ​ധാ​ന​പൂർ​വ്വം ശ്ര​വി​ച്ചി​ടു​മ്പോൾ
പ്രി​യ​മെ​നി​ക്കേ​റെ​യുൾ​ച്ചേർ​ക്കു​മാ നാദനിർ-​
ത്സ​രി​യി​ദം വാ​ഗ്രൂപ മാർ​ന്നൊ​ഴു​കി:
“തട​യി​ടു കാലമേ, നി​ന്റെ പറക്കലി-​ [7]
ന്നൊ​രു നിർ​ത്ത​ലേ​ലുക നി​ങ്ങ​ളും സു-
ന്ദര മു​ഹൂർ​ത്ത​ങ്ങ​ളേ, ഞങ്ങൾ തൻ വാ​ഴ്‌​വി​ലെ
പര​മ​ര​മ്യ​ങ്ങ​ളാം നാ​ളു​കൾ തൻ-
ദ്രു​ത​നിർ​വൃ​തി​കൾ നു​കർ​ന്നി​ടാൻ ഞങ്ങ​ളെ
ദയ​വാർ​ന്നു നി​ങ്ങ​ള​നു​വ​ദി​ക്കൂ!”
ഹത ഭാ​ഗ്യ​രെ​ത്ര​യോ പേ​രി​ങ്ങു നി​ങ്ങൾ തൻ
കരു​ണ​ക്കാ​യ് കേ​ണ​പേ​ക്ഷി​ച്ചി​ടു​ന്നു.
കു​തി​കൊ​ള്ളു, കു​തി​കൊ​ള്ളു നി​ങ്ങ​ള​വർ​ക്കാ​യി,-
ട്ട​വ​രു​ടെ നാ​ളു​കൾ​ക്കൊ​പ്പ​മെ​ന്നും
അവ​രെ​ക്ക​ര​ളു​മ​ഴൽ​ക​ളും കൊ​ണ്ടു​പോ,
അഭി​ര​ത​രാ​യോ​രെ വി​സ്മ​രി​ക്കൂ. [8]
ഇനി​യും കു​റ​ച്ചു നി​മേ​ഷ​ങ്ങൾ​ക്കാ​യി ഞാൻ
വി​ഫ​ല​മാ​യർ​ത്ഥി​പ്പു, കാ​ല​മെ​ന്റെ
വിളി കേ​ട്ടി​ടാ​തെ പറ​ക്കു​ന്നു. രാ​വോ​ടു
പറവു ഞാ​നാ​വ​തും മെ​ല്ലെ നീ​ങ്ങാൻ,
ഫല​മെ​ന്തു പക്ഷെ? യഹർ​മ്മുഖ മാഗമി-​
ച്ചി​ര​വി​നെ മാ​യ്ക്കു​വാൻ പോ​ക​യാ​ണേ.
“പ്ര​ണ​യി​ക്ക, പ്ര​ണ​യി​ക്ക നമ്മൾ പര​സ്പ​രം
പി​ടി​കി​ട്ടാ​ക്കാ​ലം പറ​ന്നു​പോ​കേ
ത്വര കൊൾക മന്നി​ലെ​ജ്ജീ​വി​തം നമ്മൾക്കാ-​
യരു​ളും മധു​ര​ങ്ങ​ളാ​സ്വ​ദി​ക്കാൻ. [9]
മനു​ജ​നു തങ്ങു​വാ​നി​ല്ലാ തു​റ​മു​ഖം
കര​യെ​ഴാ​തു​ള്ള​തു​മാ​ണു കാലം.
പ്ര​വ​ഹി​ച്ചി​ടു​ന്നി​ത​പ്ര​തി​ഹ​ത​മാ​യ​തു
പ്ര​ഥി​കർ കട​ന്നു പോ​കു​ന്നു നമ്മൾ.” [10]
പെ​രി​കേ​യ​സൂ​യാ​ലു​വാ​യു​ള്ള കാലമേ
പറയു നീ, പ്രേമമുദാരമായി-​
പ്പ​ക​രു​ന്ന മോ​ദ​ത്തിൻ മാ​ദ​ക​വേ​ള​കൾ
കദ​ന​പ്ര​ദ​ങ്ങ​ളാം നാ​ളു​കൾ തൻ-
ഗതി​വേ​ഗ​ത്തി​ങ്കൽ​ത്താൻ ഞങ്ങ​ളിൽ നി​ന്നു​മേ
അക​ലു​ക​യെ​ന്ന​തു സാ​ദ്ധ്യ​മാ​മോ? [11]
എന്നാ​ലി​തെ​ന്തൊ​ന്നു കാ​ണു​വ​തി​ല്ല​ഹോ
നിർ​വൃ​തി നാൾകൾ തൻ പാ​ടു​പോ​ലും!
എന്ത​വ​യെ​ന്നേ​യ്ക്കും പോയി മറ​ഞ്ഞെ​ന്നോ,
സമ്പൂർ​ണ്ണ​മാ​യും വി​ന​ഷ്ട​മെ​ന്നോ? [12]
അവ നമു​ക്കേ​കി മാ​ച്ചീ​ടു​ന്ന കാലമി-​
ങ്ങവ നമു​ക്കെ​ന്നും തി​രി​കെ നല്കാ?
നി​ത്യ​തേ, ശൂ​ന്യ​തേ, ഭൂതമേ, കൂ​രി​രുൾ
തി​ങ്ങു​മ​ഗാ​ധ​മാം ഗർ​ത്ത​ങ്ങ​ളേ,
നി​ങ്ങൾ വി​ഴു​ങ്ങി​ടും ഞങ്ങൾ​തൻ നാ​ളു​കൾ
കൊ​ണ്ടെ​ന്തു ചെ​യ്തി​ടു​ന്ന​ങ്ങു നി​ങ്ങൾ? [13]
തി​രി​കെ നല്കീ​ടു​മോ ഞങ്ങൾ തൻ​പ്രാ​ണ​നിൽ
പു​ള​ക​ങ്ങൾ പാകിയ പൊ​ന്നു​നാൾ​കൾ?
പൂ​മ്പൊ​യ്കെ, മൂക ശി​ല​ക​ളെ, ഗഹ്വര-​
വൃ​ന്ദ​മേ, നീല വന​ത​ല​മേ [14]
കാ​ല​ത്തിൻ കാ​ഠി​ന്യ​മേ​ല്ക്കാ​തെ നവ്യത
കാ​ല​ത്താൽ ചാർ​ത്ത​പ്പെ​ടു​ന്ന നി​ങ്ങൾ,
ചാ​രു​പ്ര​കൃ​തി, ഹാ സൂ​ക്ഷി​ച്ചു​വെ​ച്ചാ​ലും
ആ രാവിൻ സു​സ്മൃ​തി​യെ​ങ്കി​ലു​മേ.
കമ്ര​ത​ടാ​ക​മേ, നി​ന്റെ വി​ശ്രാ​ന്തി​യിൽ
നിൻ കോളിൽ നി​ന്ന​ണി​ക്കു​ന്നു​ക​ളിൽ
ഈ നീ​ല​ദേ​വ​ദാ​രു​ക്ക​ളിൽ ഇക്കാട്ടു-​
കല്ക​ളിൽ ആ സമൃതി തങ്ങി​ട​ട്ടെ.
മർ​മ്മ​രം തൂ​കി​ച്ച​രി​ക്കു​മി​ത്തെ​ന്ന​ലിൽ
നി​ന്റെ തട​ങ്ങൾ തൻ മാ​റ്റൊ​ലി​യിൽ
നിൻ​മേ​ലെ വെ​ള്ളി​പ്പു​ത​യി​ടും പാർവണ-​
ചന്ദ്ര​നിൽ ആ സ്മൃ​തി തങ്ങി​ട​ട്ടെ.
വി​മ്മു​ന്ന കാ​റ്റും നെടുവീർക്കുമിമ്മുള-​
ങ്കാ​ടും നിൻ വായു പരി​മ​ള​വും
കാ​ണു​ന്ന, കേൾ​ക്കു​ന്ന വീർപ്പിയന്നീടുന്നൊ-​
രി​ക്കാ​ണും സർ​വ്വ​ച​രാ​ച​ര​ങ്ങൾ
ഒന്നൊ​ഴി​യാ​തെ കണ്ടൊ​ന്നി​ച്ചു ചേർ​ന്നു കൊ-
ണ്ടോ​ത​ട്ടെ: “പ്രേ​മി​ച്ച​വ​രി​രു​വർ!”

Le Lac

കു​റി​പ്പു​കൾ
[1]
കാൽ​വി​നാ​ഴിക കൂടി ഞാൻ പി​റ​ന്നൊ​രീ വീ​ട്ടിൽ
മേ​വി​ടാൻ കഴി​ഞ്ഞെ​ങ്കി, ലിത്ര വേഗമോ യാത്ര!
(ജി. — എന്റെ വേളി)
ആർ​ക്കും തു​ല്യ​മാ​യാർ​ക്കു​മ​ധൃ​ഷ്യ​മാ​യ് വാ​യ്പോ​രു
നീ​ക്കു​പോ​ക്കി​ല്ലാ​ത്തോ​രാ നിയമം സനാ​ത​നം.
(ആശാൻ — ശ്രീ​ബു​ദ്ധ​ച​രി​തം)
O how feeble is man’s power
That is good fortune fall,
Cannot add another hour
Nora lost hour recall.
(John Donne — Sweetest Love)
[2]
ഓള​ങ്ങ​ളോ​ടി​വ​ന്നാ​ലിം​ഗ​നം ചെയ്യു-​
മോ​മ​ലി​രി​ക്കും ശി​ലാ​ത​ളി​മ​ത്തി​നെ…
(ചങ്ങ​മ്പുഴ — സ്പ​ന്ദി​ക്കു​ന്ന അസ്ഥി​മാ​ടം)
സാ​ഗ​ര​ത​രം​ഗ​ങ്ങൾ കാലടി കഴു​കു​വാൻ
വേ​ഗ​മോ​ടാ​വേ​ശം പൂ​ണ്ട​ണ​യും കൂ​ട​ക്കൂ​ടേ.
(കട​മ്മ​നി​ട്ട — ഒരു പഴയ പ്രേ​മം)
തിരകൾ കാൽ​വി​രൽ​ത്തു​മ്പിൽ തൊ​ടു​ന്ന
വലിയ പാ​റ​യിൽ ഞാ​നി​രി​ക്കു​മ്പോൾ
(ദേവി — വെ​റു​മൊ​രു പ്രേ​മ​ഗാ​നം)
കര​ഞ്ഞു നീ​യി​രു​ന്ന കൽ​ത്ത​റ​യ്ക്കു മേ​ലെ​യി​ന്നു ഞാ-
നി​രു​ന്നു നി​ന്നെ യോർ​മ്മ​യിൽ​ത്തി​രി​ച്ചു കൊ​ണ്ടു​വ​ന്നി​ടും.
(കെ. വി. ബേബി — സ്മൃ​തി​പ്പ​ടർ​പ്പു​കൾ)
തിരകൾ പലേ​വ​ട്ടം വന്നു കാൽ നന​ച്ചെ​ന്നോ
തി​രി​കെ​പ്പോ​യി.…
(പ്ര​ഭാ​വർ​മ്മ — കടൽ പറഞ്ഞ കഥ)
[3]
ദളിതം = വി​ള്ള​ലു​ക​ളു​ള്ള
[4]
ഇപ്പോ​ലേ = ഇപ്പോൾ തന്റെ കാ​ലി​ന്മേൽ അർ​പ്പി​ക്കു​ന്ന​തു​പോ​ലെ
[5]
നീരവം = തമ്മിൽ ഒന്നും സം​സാ​രി​ക്കാ​തെ
ഏറു​ന്നൊ​രി​മ്പ​മ​തി​നാൽ മൊ​ഴി​വി​ട്ടു ഞങ്ങൾ
കൂ​റാർ​ന്നി​ടു​ന്നു തനിയേ വെ​റു​തേ​യി​രി​പ്പിൽ
പാ​രിൽ​പ്പ​ലേ സുഖമയൂഖഗണത്തിനൊറ്റ-​
വേ​രാ​യ​ടി​ക്കു വി​ല​സും രവി മൗ​ന​മ​ത്രേ.
(ആശാൻ — ഒരു വന​യാ​ത്ര)
സു​ന്ദ​രം നി​ന്റെ നി​ശ്ശ​ബ്ദ​ത​യു​ടെ
നർമ്മ സല്ലാ​പ​മാം വീ​ണ​വാ​യന.
(പി. കു​ഞ്ഞി​രാ​മൻ നായർ — എന്റെ രഹ​സ്യ​ക്കാ​രി)
ദേവ, നിൻ മൗ​ലി​യെ​ന്നോ​ടു ചേർ​ത്തു ഞാൻ
മേ​വു​മൊ​ര​ക്ഷ​രം മി​ണ്ടി​ടാ​തെ
(ചങ്ങ​മ്പുഴ — ഹേ​മ​ന്ത​ച​ന്ദ്രിക)
സം​സാ​രി​ക്ക​ണ​മെ​ങ്കിൽ
നി​ശ്ശ​ബ്ദം സം​സാ​രി​ക്കുക,
പാറ മര​ങ്ങ​ളോ​ടും
മര​ങ്ങൾ പൂ​ക്ക​ളോ​ടു​മെ​ന്ന​പോ​ലെ.
ഏറ്റ​വും മധു​ര​മായ ശബ്ദം
മൗ​ന​മാ​കു​ന്നു.
(സച്ചി​ദാ​ന​ന്ദൻ — ഉത്ത​ര​കാ​ണ്ഡം)
ഇരി​ക്ക​യാ​ണ​വർ പ്ര​ണ​യി​കൾ, നെഞ്ചി-​
ലൊ​തു​ക്കി​വെ​ച്ചി​ടും ഒതു​ങ്ങാ​ത്ത സ്നേ​ഹം
മു​റി​ക്കു​ള്ളിൽ മൗ​ന​സ​മു​ദ്ര​മാ​കു​ന്നു.
(സി​ന്ധു ഭാ​സ്ക​രൻ — പ്ര​ണ​യി​ക​ളു​ടെ മധ്യാ​ഹ്നം)
[6]
പക​ല​ന്തി​നേ​രം
ജല​സ​ന്ധി മൂകം
ഒരു തോ​ണി​യിൽ നാം…
(കെ. ജി. ശങ്ക​ര​പ്പി​ള്ള — പ്രേ​മ​മെ​ന്നെ​ന്തി​നെ നാം വി​ളി​ക്കു​ന്നു)
[7]
Sweet Thames, run softly till I end my song.
(Edmund Spenser — Prothalamion)
[8]
അഭി​ര​തർ = സന്തു​ഷ്ടർ
[9]
വി​ളം​ബ​രം ചെ​യ്വൂ: വിളംബമെന്യെയാ-​
ഗളം സ്വ​ജീ​വിത മധു​നു​ക​രു​വിൻ,
സമ​യ​പീ​യു​ഷ​മൊ​ലി​ക്കു​ന്നു തൃഷ്ണാ-​
ശമം വരു​ത്തു​വാൻ കഴി​യി​ല്ലാ പി​ന്നെ.
(ജി. — പി​ന്ന​ത്തെ വസ​ന്തം)
പാടുക സർ​വ്വാ​ത്മ​നാ ജീ​വി​ത​ത്തി​നെ സ്നേഹി-​
ച്ചീ​ടു​വാൻ പഠി​ച്ചൊ​രീ നമ്മു​ടെ ചി​ത്താ​മോ​ദം.
(വൈ​ലോ​പ്പി​ള്ളി — ഊഞ്ഞാ​ലിൽ)
പൂ​ക്ക​ളെ​പ്പോ​ലെ നി​മി​ഷ​ങ്ങ​ളി​ങ്ങു​തി​രു​ന്നു;
നോ​ക്കുക നമു​ക്കു തൽ​സ്സൗ​രഭ മുൾ​ക്കൊ​ള്ളു​വാൻ.
(ബാ​ലാ​മ​ണി​യ​മ്മ — വി​ശ്വാ​മി​ത്രൻ)
ഭുവന ജീവിത വാ​ഹി​നി​യെ​പ്പൊ​ഴും
ദ്രു​ത​ഗ​തി​യിൽ കു​തി​ക്കു​ക​യ​ല്ല​യോ?
വരിക, യെ​ന്തും ക്ഷ​ണി​ക​മാ​ണൊ​ക്കെ​യും
മറയു മീ നമ്മ​ളെ​ല്ലാം പി​രി​ഞ്ഞി​ടും.
അതിനു മു​മ്പു പറയേണ്ടതൊക്കെയു-​
മതി​മ​ധു​രം പറ​ഞ്ഞു നാം തീർ​ക്കുക.
(ചങ്ങ​മ്പുഴ — ഇരു​ളിൽ)
ചി​ന്തി​ച്ചി​രി​ക്കാ​നി​ട​യി​ല്ല, വണ്ടു​പോൽ
പൂ​ന്തേൻ നു​ക​രാൻ വിടുക ചി​ത്ത​ത്തി​നെ.
(പി. കു​ഞ്ഞി​രാ​മൻ നായർ — പരീ​ക്ഷ)
[10]
പാ​ന്ഥർ പെ​രു​വ​ഴി​യ​മ്പ​ലം തന്നി​ലേ…
(എഴു​ത്ത​ച്ഛൻ — അദ്ധ്യാ​ത്മ​രാ​മാ​യ​ണം)
[11]
വാ​നി​ന്നു പീ​ലി​പ്പു​തു​മാല ചാർ​ത്തും
കാർ​വി​ല്ലു​മാ​യു​ന്നി​തു കാൽ​ക്ഷ​ണ​ത്തിൽ,
മലീ​മ​സം ദുർ​ദ്ദി​ന​മോ പെരുമ്പാ-​
മ്പെ​ന്നാ​വി​ധം നീ​ണ്ടു കി​ട​ന്നു​കൊ​ള്ളും.
(നാ​ല​പ്പാ​ടൻ — കണ്ണു​നീർ​ത്തു​ള്ളി)
[12]
ഭോ​ഗ​ങ്ങ​ളൊ​ക്കെ ക്ഷ​ണ​പ്ര​ഭാ​ച​ഞ്ച​ലം…
വേഗേന പോ​യി​ടു​മാ​യു​സ്സു​മോർ​ക്ക നീ
(എഴു​ത്ത​ച്ഛൻ — അദ്ധ്യാ​ത്മ​രാ​മാ​യ​ണം)
പര​കോ​ടി​കൾ പാ​വ​ന​ങ്ങ​ളാം
പരമ പ്രേമ സു​ഖാ​നു​ഭൂ​തി​കൾ
പരി​ചാ​ര​ക​രാ​യ് ലസിച്ചൊരാ-​
പ്പ​രി​ചേ​ലും സു​ദി​ന​ങ്ങ​ളെ​ങ്ങു​പോ​യ്?
(ചങ്ങ​മ്പുഴ — തപ്ത​സ​ന്ദേ​ശം)
The golden hours on angel wings
Flew o’er me and my dearie.
(R. Burns — Highland Mary)
[13]
വാ പി​ളർ​ത്തു​ന്നോ​ര​തി​ന്റെ ഗർ​ത്ത​ങ്ങ​ളിൽ
വാടി വീ​ഴു​ന്നു ദി​ന​ങ്ങൾ…
അന്ത​മ​റ്റോ​ള​മ​ടി​ച്ചു കിടക്കുമ-​
തെ​ന്തൊ​ര​പാ​ര​ത​യാ​വോ?
(ചങ്ങ​മ്പുഴ — സാ​യൂ​ജ്യ​ദീ​പ്തി)
[14]
ഗഹ്വ​രം = ഗുഹ
Colophon

Title: French Romantic Poems (ml: ഫ്ര​ഞ്ച് പ്ര​ണ​യ​ഗീ​ത​ങ്ങൾ).

Author(s): Mangalat Raghavan.

First publication details: DC Books; Kottayam, Kerala; 2003.

Deafult language: ml, Malayalam.

Keywords: Poem, Mangalat Raghavan, French Romantic Poems, മം​ഗ​ലാ​ട്ട് രാഘവൻ, ഫ്ര​ഞ്ച് പ്ര​ണ​യ​ഗീ​ത​ങ്ങൾ, Open Access Publishing, Malayalam, Translation, Sayahna Foundation, Free Software, XML.

Digital Publisher: Sayahna Foundation; JWRA 34, Jagthy; Trivandrum 695014; India.

Date: September 18, 2021.

Credits: The text of the original item is copyrighted to the author. The text encoding, editorial notes and index were created and​/or prepared by the Sayahna Foundation and are licensed under a Creative Commons Attribution By NonCommercial ShareAlike 4​.0 International License (CC BY-​NC-SA 4​.0). Commercial use of the content is prohibited. Any reuse of the material should credit the Sayahna Foundation and must be shared under the same terms.

Cover: Shepherds idyll on the river, a painting by Jean François Duval (1776-1854). The image is taken from Wikimedia Commons and is gratefully acknowledged.

Production history: Data entry: Staffers at River Valley; Proofing: KB Sujith; Typesetter: CVR; Editor: PK Ashok; Digitizer: KB Sujith; Encoding: CVR.

Production notes: The entire document processing has been done in a computer running GNU/Linux operating system and TeX and friends. The PDF has been generated using XeLaTeX from TeXLive distribution 2021 using Ithal (ഇതൾ), an online framework for text formatting. The TEI (P5) encoded XML has been generated from the same LaTeX sources using LuaLaTeX. HTML version has been generated from XML using XSLT stylesheet (sfn-​tei-html.xsl) developed by CV Radhakrkishnan.

Fonts: The basefont used in PDF and HTML versions is RIT Rachana authored by KH Hussain, et al., and maintained by the Rachana Institute of Typography. The font used for Latin script is Linux Libertine developed by Phillip Poll.

Web site: Maintained by KV Rajeesh.

Download document sources in TEI encoded XML format.

Download PDF.